முன்னாள் பாராளுமன்ற உறுப்பினர் சிவாஜிலிங்கம் காலமானார்

தமிழ்த் தேசிய அரசியலில் நீண்டகாலம் பயணித்தவரும், முன்னாள் நாடாளுமன்ற உறுப்பினரும், வல்வெட்டித்துறை நகர சபையின் முன்னாள் தவிசாளருமான எம்.கே. சிவாஜிலிங்கம் தனது 69ஆவது வயதில் காலமானார்.

வடமராட்சி, வல்வெட்டித்துறையைப் பிறப்பிடமாகக் கொண்ட மகாலிங்கம் கனகலிங்கம் சிவாஜிலிங்கம், கடந்த சில வருடங்களாக சிறுநீரகப் பாதிப்பினால் அவதிப்பட்டு வந்தார்.

சிறுநீரகங்கள் செயலிழந்த நிலையில், கடந்த ஜூன் மாதம் கொழும்பில் சிறுநீரக மாற்று அறுவைச் சிகிச்சைக்கு உட்படுத்தப்பட்டிருந்தார். தொடர்ந்து மருத்துவக் கண்காணிப்பில் இருந்து வந்த அவருக்கு அண்மையில் மீண்டும் உடல்நலப் பாதிப்பு ஏற்பட்டது.

பின்னர் பருத்தித்துறை ஆதார வைத்தியசாலையின் அதிதீவிர சிகிச்சைப் பிரிவில் அனுமதிக்கப்பட்டு சிகிச்சை பெற்று வந்த நிலையில், நேற்று 14ஆம் திகதி நள்ளிரவை அண்மித்த நேரத்தில் உயிரிழந்தார்.