எரிபொருள் விலை திருத்தம் குறித்த அறிவிப்பு இன்று

ஒக்டோபர் மாதத்திற்கான எரிபொருள் விலை திருத்தம் குறித்த அறிவிப்பு இன்று (30) இரவு வெளியிடப்படவுள்ளதாக எரிசக்தி அமைச்சர் அனுர கருணாதிலக்க தெரிவித்தார்.

இன்று நடைபெற்ற ஊடகவியலாளர் சந்திப்பில் பேசிய எரிசக்தி அமைச்சர், எரிபொருள் விலை திருத்தம் பொதுவாக ஒவ்வொரு மாதத்தின் இறுதி நாளிலும் மேற்கொள்ளப்படுவதாகக் குறிப்பிட்டார்.

வரவிருக்கும் விலை திருத்தத்தின் ஒரு பகுதியாக, ஒரு லீட்டர் டீசலுக்கு 70 ரூபாய் மானியம் வழங்க அரசாங்கம் திட்டமிட்டுள்ளதாகவும் அவர் கூறினார்.

உலக சந்தையில் எரிபொருள் விலைகள் அதிகரித்ததன் காரணமாகத் தாங்கள் சந்தித்து வரும் நஷ்டம் குறித்து இலங்கையிலுள்ள எரிபொருள் விநியோகஸ்தர்கள் அரசாங்கத்திற்குத் தெரிவித்துள்ளதாக அமைச்சர் சுட்டிக்காட்டினார்.

குறித்த நிறுவனங்களின் தகவல்களின்படி, டீசல் விற்பனையில் ஏற்படும் நஷ்டம் நிறுவனத்திற்கு நிறுவனம் மாறுபட்டு, ஒரு லீட்டருக்கு சுமார் 120 ரூபாய், 135 ரூபாய், 192 ரூபாய் மற்றும் 247 ரூபாய் என்ற அளவை எட்டியுள்ளதாகத் தெரிவிக்கப்படுகிறது.

எரிபொருள் மானியத்தை வழங்குவதன் மூலம் இலங்கை பெற்றோலியக் கூட்டுத்தாபனம் (CPC) பெரும் நிதிச் சுமையை எதிர்கொண்டு வருவதாகவும், அதேவேளையில் ஆண்டின் இறுதிக்குள் அக்கூட்டுத்தாபனத்திற்கு நஷ்டம் ஏற்படாதவாறு நடவடிக்கைகள் எடுக்கப்பட்டு வருவதாகவும் அமைச்சர் கருணாதிலக்க தெரிவித்தார்.

டீசலுக்கு வழங்கப்படும் மானியம் பெட்ரோலுக்கு நீடிக்கப்படாது என்றும் அவர் மேலும் குறிப்பிட்டார்.