திருச்சி-இலங்கை இடையே கூடுதல் விமானச் சேவையை ஸ்ரீலங்கன் விமான நிறுவனம் தொடங்கியது

திருச்சி-இலங்கை இடையே கூடுதல் விமானச் சேவையை ஸ்ரீலங்கன் விமான நிறுவனம் வியாழக்கிழமை தொடங்கியது.

திருச்சி சர்வதேச விமான நிலையத்திலிருந்து சிங்கப்பூா், மலேசியா, இலங்கை, துபை, சாா்ஜா உள்ளிட்ட நாடுகளுக்கு தினசரி விமானங்கள் இயக்கப்படுகின்றன. இவற்றில் இலங்கை தவிர மற்ற நாடுகளுக்கு தினசரி 1 முதல் 4 சேவைகள் உள்ளன.

ஆனால் இலங்கைக்கு விமானங்களை இயக்கும் ஸ்ரீலங்கன் விமான நிறுவனம் தினசரி 1 என்ற வகையில் வாரந்தோறும் 7 சேவைகளை மட்டுமே இயக்கி வந்தது. அதன்படி வாரத்தில் செவ்வாய், புதன், சனி, ஞாயிற்றுக்கிழமைகளில் காலை 9.10 மணிக்கு இலங்கையிலிருந்து வரும் விமானம் 10.10-க்கு மீண்டும் இலங்கை செல்லும். இதுபோல திங்கள், வியாழன், வெள்ளிக்கிழமைகளில் பிற்பகல் 3.05 மணிக்கு இலங்கையிலிருந்து வரும் விமானம் 4.10-க்கு புறப்பட்டு செல்கிறது.

இந்நிலையில் வியாழக்கிழமைகளில் காலையும் இலங்கைக்கு கூடுதல் விமானச் சேவை ஏற்படுத்தப்பட்டுள்ளது. இதற்காக திருச்சியில் வியாழக்கிழமை நடந்த விழாவில் ஸ்ரீலங்கன் விமான நிறுவன திருச்சி நிலைய மேலாளாளர் அஜாஸ் உள்ளிட்டோா் கூடுதல் சேவையைத் தொடங்கி வைத்தார்.

(திருச்சி எம். கே. ஷாகுல் ஹமீது)