பள்ளிவாசல்துறை முஸ்லிம் மகா வித்தியாலயத்தின் சாதாரண தரத்தில் சிறந்த பெறுபேறு பெற்ற மாணவர்கள் கௌரவிப்பு

கற்பிட்டி பள்ளிவாசல்துறை முஸ்லிம் மகா வித்தியாலயத்தில் 2023 ஆம் ஆண்டு நடைபெற்ற கல்வி பொதுத் தராதர சாதாரண பரீட்சையில் சித்தி பெற்ற 51 மாணவர்கள் கௌரவிப்பு நிகழ்வு பாடசாலையின் அதிபர் எம்.ஏ.எம் றிஸ்கான் தலைமையில் நடைபெற்றது.

இந்நிகழ்வில் கற்பிட்டி கோட்டக்கல்விப் பணிப்பாளர் ஏ எம் ஜவாத் பிரதம அதிதியாக கலந்து சிறப்பித்தார்.

2023 ஆம் ஆண்டு தரம் 11 வகுப்பு ஆசிரியர்களின் ஏற்பாட்டில் இடம்பெற்ற இந்நிகழ்வில் 9 ஏ பெற்று பாடசாலைக்கும் ஊருக்கு பெருமை சேர்த்த ஹாரிஸ் பாத்திமா ஹம்னா மாணவி மற்றும் சிறப்பு சித்திகள் பெற்ற மேலும் 15 மாணவர்கள் சிறப்பு பரிசுகள் வழங்கியும் இன்னும் உயர்தரத்திற்கு தகுதி பெற்ற 35 மாணவர்கள் பதக்கம் அணிவித்தும் கௌரவிக்கப்பட்டனர்.

2023 ஆம் ஆண்டு இப்பாடசாலையில் சாதாரண தர மாணவர்களுக்கு கற்பித்து தற்போது வேறு பாடசாலைகளில் கடமையாற்றும் ஆசிரியர்களும் இங்கு வரவழைக்கப்பட்டு கௌரவிக்கப்பட்டமையும் குறிப்பிடத்தக்கது.

(கற்பிட்டி எம் எச் எம் சியாஜ், புத்தளம் எம் யூ.எம் சனூன்)