இலங்கையில் கைது செய்யப்பட்ட மீனவர்களையும் அவர்களின் மீன்பிடி உபகரணங்களுடன் கூடிய படகுகளையும் உடனடியாக விடுவிக்க முயற்சிகள் எடுக்க வேண்டும்..! -முதல்வர் மு.க.ஸ்டாலின் தலைமையில் நடைபெற்ற திமுக நாடாளுமன்ற உறுப்பினர்கள் கூட்டத்தில் தீர்மானம்

சென்னை அண்ணா அறிவாலயத்தில் முதல்வரும் திமுக தலைவருமான மு.க.ஸ்டாலின் தலைமையில் நடைபெற்ற திமுக நாடாளுமன்ற உறுப்பினர்கள் கூட்டத்தில் பிரதமர் நரேந்திர மோடி அவர்கள் நேரடியாகக் கவனம் செலுத்தி நிரந்தரத் தீர்வு காணவும், இலங்கையில் கைது செய்யப்பட்ட மீனவர்களையும் அவர்களின் மீன்பிடி உபகரணங்களுடன் கூடிய படகுகளையும் உடனடியாக விடுவிக்க முயற்சிகள் எடுக்க வேண்டும் உள்ளிட்ட 12 தீர்மானங்கள் நிறைவேற்றப்பட்டன.

தமிழ்நாடு முதல்வர், கழகத் தலைவர் மு.க.ஸ்டாலின் தலைமையில், சனிக்கிழமை காலை 10 மணி அளவில் சென்னை, அண்ணா அறிவாலயத்தில் உள்ள முரசொலி மாறன் கூட்ட அரங்கத்தில் நடைபெற்றது.கூட்டத்தில் பொதுச்செயலாளர் துரைமுருகன், முதன்மை செயலாளர் கே. என். நேரு, துணைப் பொதுச்செயலாளர் கனிமொழி மற்றும் திமுக நாடாளுமன்ற உறுப்பினர்கள் கலந்து கொண்டார்கள்.

கூட்டத்தில் நிறைவேற்றப்பட்ட தீர்மானங்கள் பின்வருமாறு:
கடந்த ஏப்ரல் 24 ஆம் தேதி தமிழ்நாடு சட்டப் பேரவையில், 2024-25-ஆம் ஆண்டிற்கான உயர்கல்வித் துறை மானியக் கோரிக்கையின்போது, முத்தமிழறிஞர் கலைஞர் பெயரில் கும்பகோணத்தில் விரைவில் புதிய பல்கலைக்கழகம் அமைக்கப்படும் எனத் தமிழ்நாடு சட்டப் பேரவையில் அறிவிக்கப்பட்டது. பாமர மக்களின் பள்ளிக்கனவை மட்டுமல்ல, உயர்கல்விக் கனவையும் நனவாக்கிய முத்தமிழறிஞர் கலைஞர் பெயரிலான பல்கலைக்கழகத்திற்கு 28 ஆம் தேதி சட்ட முன்வடிவு பேரவையில் தாக்கல் செய்யப்பட்டு, 29 ஆம் தேதி பேரவையில் நிறைவேற்றப்பட்டு, மே 2 ஆம் தேதி தமிழ்நாடு ஆளுநரின் ஒப்புதலுக்காக அனுப்பி வைக்கப்பட்டது.

மக்களால் தேர்ந்தெடுக்கப்பட்ட அரசு நிறைவேற்றி அனுப்பும் மசோதாக்களை மதிக்கத் தெரியாத ஆளுநர், மேற்கண்ட சட்டமுன்வடிவிற்கு ஒப்புதல் அளிப்பதற்குப் பதில், குடியரசுத் தலைவருக்கு அனுப்பி வைத்து, திராவிட இயக்கத்தின் கல்வித் தொண்டின் மீது அவருக்கு உள்ள வெறுப்பைக் காட்டியிருக்கிறார். மக்களாட்சித் தத்துவத்தை நிலைநாட்டிட உச்சநீதிமன்றத்தை அரசு நாடியுள்ள நிலையில், கலைஞர் பல்கலைக்கழகச் சட்டமுன்வடிவிற்குக் குடியரசுத் தலைவர் உடனடியாக ஒப்புதல் அளிக்க வேண்டும் எனவும், சட்டப்பேரவையில் நிறைவேற்றி அனுப்பி வைக்கப்படும் மசோதாக்களுக்கு ஆளுநர் ஒப்புதல் அளிக்க கால நிர்ணயம் செய்யும் சட்டப் போராட்டத்தில் ஓயமாட்டோம் எனவும் திமுக தலைவர் மற்றும் முதல்வரின் சபதத்தை நிறைவேற்றும் வகையில் நாடாளுமன்றக் கூட்டத்தொடரில் திமுக எம்.பி.,க்கள் குரல் கொடுப்பார்கள்.

தமிழ்நாடு 1076 கி.மீ நீளமுள்ள கடற்கரையைக் கொண்டுள்ளது. இங்கு மீன் பிடித்தலை வாழ்வாதாரமாகக் கொண்ட ஏராளமான கடலோர சமூகங்கள் உள்ளனர். சமீப காலங்களில், இந்திய மீனவர்கள் இலங்கை அதிகாரிகளால் தொடர்ச்சியாக கைது செய்யப்படுவதும், அவர்களின் படகுகள் மற்றும் மீன்பிடி உபகரணங்களைப் பறிமுதல் செய்வதும் கடும் வேதனையான வழக்கமாகியுள்ளது. இந்த இடையறாத கைது நிகழ்வுகளால் மாநிலத்தில் உள்ள ஏழை மீனவ குடும்பங்களின் வாழ்வாதாரம் கடுமையாகப் பாதிக்கப்பட்டுள்ளது. கைது செய்யப்பட்ட இந்திய மீனவர்கள் மற்றும் பறிமுதல் செய்யப்பட்ட மீன்பிடி படகுகளை விடுவிப்பது தொடர்பாக மாண்புமிகு பிரதமர் அவர்களுக்கு 11 கடிதங்களும், மத்திய வெளியுறவுத்துறை அமைச்சருக்கு 74 கடிதங்களும் எழுதியும் இலங்கை அரசால் இந்திய மீனவர்கள் கைது செய்யப்படுவது மற்றும் தாக்குதலுக்கு உள்ளாவது தொடர்வது தமிழ்நாட்டு மீனவச் சமூகத்தினரிடையே கடுமையான கொந்தளிப்பை ஏற்படுத்தியுள்ளது. இந்நாள்வரை 247 மீன்பிடி படகுகள் பறிமுதல் செய்யப்பட்டும், 96 இந்திய மீனவர்கள் கைது செய்யப்பட்டும் இலங்கை அரசின் சிறைக் காவலில் உள்ளதால் அந்த குடும்பங்கள் எல்லாம் துயரமிகு நாட்களில் பயணித்துக் கொண்டிருக்கின்றனர். 2018-ஆம் ஆண்டுக்குப் பிறகு இந்நாள்வரை பறிமுதல் செய்யப்பட்ட படகுகளை நாட்டுடைமையாக்கும் இலங்கை அரசின் சமீபத்திய அதீத கொள்கை என்பது, தமிழ்நாட்டில் உள்ள இலட்சக்கணக்கான மீனவர்கள் மற்றும் அவர்களது குடும்பங்களின் வாழ்வாதாரத்தையும், எதிர்காலத்தையும் பாதிக்கும் நடவடிக்கையாகும். கடுமையான அபராதம் விதிப்பதையும், கைது செய்யப்பட்ட படகுகளை நாட்டுடைமையாக்குவதையும் தடுக்க ஒன்றிய அரசு இதுவரை எவ்வித நடவடிக்கையும் எடுக்கவில்லை என்பதை ஆழ்ந்த கவலையுடன் பதிவு செய்யும் இக்கூட்டம், இப்பிரச்சினையில் பிரதமர் நரேந்திர மோடி அவர்கள் நேரடியாகக் கவனம் செலுத்தி நிரந்தரத் தீர்வு காணவும், கைது செய்யப்பட்ட மீனவர்களையும் அவர்களின் மீன்பிடி உபகரணங்களுடன் கூடிய படகுகளையும் உடனடியாக விடுவிக்க முயற்சிகள் எடுக்க வேண்டுமெனவும் வலியுறுத்துகிறது உள்ளிட்ட 12 தீர்மானங்கள் நிறைவேற்றப்பட்டன.

(திருச்சி எம். கே. ஷாகுல் ஹமீது )