கெப் வாகனங்களை கொள்வனவு செய்வதற்கான ஒதுக்கப்பட்ட நிதியை பேரிடரால் பாதிக்கப்பட்ட மக்களுக்காக பயன்படுத்துங்கள்..! -சஜித் பிரேமதாச

1,775 புதிய கெப் வாகனங்களை கொள்வனவு செய்வதற்கு வரவு செலவுத் திட்டத்தில் இருந்து ஒதுக்கப்பட்ட ரூ.12,500 மில்லியனை பேரிடரால் பாதிக்கப்பட்ட மக்களுக்கு நிவாரணம் வழங்க பயன்படுத்துங்கள்.

நமது நாடு பெரும் பேரனர்த்த சவால்களை எதிர்கொண்டு, பல துயர சம்பவங்கள் நிகழ்ந்து, நமது சக குடிமக்கள் தங்கள் உயிர்களையும், சொத்துக்களையும், வீடுகளையும் இழந்திருக்கும் இந்நேரத்தில், 1,775 புதிய கெப் வாகனங்களை கொள்வனவு செய்வதற்கு ஒதுக்கிய ரூ.12,500 மில்லியனை பேரிடரால் பாதிக்கப்பட்ட மக்களுக்கு நிவாரணம் வழங்கப் பயன்படுத்தி, பாதிக்கப்பட்ட மக்களின் வாழ்க்கையை கட்டியெழுப்புவதற்கும், சேதடமைந்த நாட்டின் உட்கட்டமைப்பு வசதிகளை பெற்றுக் கொடுப்பதற்கும் முன்னுரிமை அளிக்க வேண்டும். மக்களின் இழந்த வாழ்வாதாரங்களை மேம்படுத்துவதற்கும், பாதிக்கப்பட்ட மக்கள் எதிர்கொள்ளும் சவாலான பிரச்சினைகளுக்கு பதில்களையும் தீர்வுகளைப் பெற்றுக் கொடுக்கும் முகமாக புதிய கெப் வாகனங்களை கொள்வனவு செய்வதற்கு ஒதுக்கிய இந்தப் பணத்தைப் பயன்படுத்துமாறு அரசாங்கத்திற்கு யோசனை முன்வைக்கிறேன் என்று எதிர்க்கட்சித் தலைவர் சஜித் பிரேமதாச தெரிவித்தார்.

நாட்டைத் தாக்கிய ‘டித்வா’ சூறாவளிப் புயலால் ஏற்பட்ட கடுமையான பேரழிவால் ஏற்பட்ட வெள்ளம் மற்றும் மண்சரிவுகள் காரணமாக பல மாவட்டங்களில் மக்கள் இடம்பெயர்ந்துள்ளனர். இவ்வாறு பாதிக்கப்பட்டு இடைத்தங்கல் முகாம்களில் இருக்கும் மக்களின் சுக துக்கங்களை கேட்டறிய எதிர்க்கட்சித் தலைவர் சஜித் பிரேமதாச இன்று (29) கள விஜயங்களை மேற்கொண்டார். இதன்போது கடுவெல கொத்தலாவல கல்லூரி, சங்கபிட்டித விகாரை, கடுவெல ஹேவாகம அபிநவராம விகாரை, கொரத்தோட்டை, நவகமுவ ஸ்ரீ அசோகராமய, போமிரிய கனிஷ்ட வித்திலாயம் உட்பட பல இடைத்தங்கல் முகாம்களுக்கு விஜயம் செய்தார்.

வரவுசெலவுத் திட்டத்தின் குழு நிலை விவாதம் நடந்து வரும் இச்சமயம், ​​பாதிக்கப்பட்ட பகுதிகளுக்கு மக்களின் நலனுக்காக புதிய கெப் வாகனங்களை கொள்வனவு செய்வதற்கு ஒதுக்கிய இந்தப் பணத்தைப் ஒதுக்கும் வகையில் வரவுசெலவுத் திட்டத்தில் மாற்றத்தைக் கொண்டுவருவதற்குத் தேவையான ஆதரவைப் பெற்றுத் தருவோம் என எதிர்க்கட்சித் தலைவர் தெரிவித்தார்.

மேலும், பாதிக்கப்பட்ட பகுதிகளில் உள்ள மக்களின் உயிரைப் பாதுகாத்து, வாழ்வாதாரங்களைக் கட்டியெழுப்ப, உட்கட்டமைப்பு வசதிகளை மேம்படுத்த மேலதிக நிதியைப் பெறுவதற்கு அரசாங்கம் குறை நிரப்பு பிரேரணையொன்றை கொண்டு வரும் பட்சத்தில், அதற்கு நாம் எமது பூரண ஆதரவைத் தருவோம். இந்நேரத்தில் சர்வதேச ஆதரவைத் திரட்டும் மாநாடே தேவையாக காணப்படுகின்றது. எனவே இந்த மாநாட்டைக் கூட்டுவதற்கு அரசாங்கம் நடவடிக்கை எடுக்க வேண்டும். இவ்வாறு கூட்டும் பட்சத்தில் எதிர்க்கட்சியாக நாம் எமது கூடிய ஈடுபாட்டுடன் எமது பங்களிப்பைப் பெற்றுத் தந்து, நாட்டுக்குத் தேவையான நிதியைத் திரட்ட முழுமையான ஒத்துழைப்பை பெற்றுத் தருவோம் என்று எதிர்க்கட்சித் தலைவர் தெரிவித்தார்.

இனம், மதம், சாதி, வர்க்கம் மற்றும் கட்சி வேறுபாடுகளை ஒதுக்கி வைத்துவிட்டு, சுயதொழில், மீன்பிடி மற்றும் பிற வாழ்வாதாரங்களில் ஈடுபட்டுள்ளவர்களின் வாழ்க்கையைப் பாதுகாக்க மக்கள் ஒன்றாய் கைகோர்த்து ஒன்றிணைந்து செயல்பட வேண்டும் என்றும் எதிர்க்கட்சித் தலைவர் சஜித் பிரேமதாச இங்கு சகலருக்கும் அழைப்பு விடுத்தார்.