மாறா விட்டால், மாற்றப்படுவீர்கள்; அரச அதிகாரிகளுக்கு ஜனாதிபதி எச்சரிக்கை

ஊழலை ஒழிப்பதற்கான முயற்சிகளை தீவிரப்படுத்தும் வகையில், இந்த ஆண்டு மே மாதத்திற்குப் பிறகு ஊழல் நிறைந்த அரசு நிறுவனங்கள் மற்றும் அவற்றின் தலைமைகளில் மாற்றங்களைச் செய்ய நடவடிக்கை எடுக்கப்படும் என்று ஜனாதிபதி அனுரகுமார திசாநாயக்க எச்சரித்துள்ளார்.
ஆட்சிக்கு வந்த பின்னர், ஊழலைக் கட்டுப்படுத்த அரசு நிறுவனங்களுக்கு மூன்று மாத கால அவகாசம் அளித்ததாகவும், தற்போது அந்தக் காலம் 06 மாதங்களாக நீட்டிக்கப்பட்டுள்ளதாகவும் ஜனாதிபதி அனுரகுமார திசாநாயக்க தெரிவித்தார்.

“கடந்த ஆறு மாதங்களாக நாங்கள் மாற்றத்திற்கான கால அவகாசத்தை வழங்கி காத்திருக்கிறோம். அவர்கள் மாறத் தயாராக இல்லை என்றால், இந்த மே மாதம் முதல் அவர்கள் மாற்றப்படுவார்கள். பொதுமக்களால் எதிர்பார்க்கப்பட்டபடி, அரச தலைவராக, மாற்றத்திற்குத் தேவையான நேரத்தை வழங்குவது எனக்கு மட்டுமே உரிமை. ஆனால் எந்த மாற்றங்களும் இல்லை என்றால், மாற்றம் செய்யப்படும்,” என்று அவர் எச்சரித்தார்.

ஊழலை ஒழிப்பதும், அடுத்த தலைமுறைக்கு அது பரவாமல் தடுப்பதும் அரசாங்கத்தின் பொறுப்பாகும் என்று ஜனாதிபதி திசாநாயக்க மேலும் தெரிவித்தார்.

லஞ்சம் அல்லது ஊழலுக்கு எதிராக நடவடிக்கை எடுக்க அதிகாரம் பெற்ற நிறுவனங்கள் வரை ஊழல் பரவலாக இருப்பதால் ஒரு கடுமையான பிரச்சினை எழுந்துள்ளதாக அவர் சுட்டிக்காட்டினார்.

“அரசியல்வாதிகள், பொது சேவை அதிகாரிகள், காவல்துறை அதிகாரிகள் மற்றும் தொழிலதிபர்கள் அனைவரும் தற்போது ஊழலில் ஈடுபட்டுள்ளனர். சொந்தமாக தொழில் செய்து கருப்பு பணத்தை மாற்றும் தொழிலதிபர்கள்தான் சமீப காலங்களில் , கோடீஸ்வரர்களாகவும் உருவெடுத்துள்ளனர். அவர்கள் பல அமைப்புகளில் ஆதிக்கம் செலுத்தி, முக்கிய பதவிகளை வகிக்கின்றனர். இந்த வலையமைப்பில் பாதாள உலக நபர்களும் உள்ளனர். இது ஊழலுக்கு எதிராக சட்டத்தை செயல்படுத்த அதிகாரம் பெற்ற நிறுவனங்களின் நம்பகத்தன்மை குறித்து பொதுமக்களிடையே சந்தேகங்களை ஏற்படுத்தியுள்ளது,” என்று ஜனாதிபதி கூறினார்.

‘தேசிய ஊழல் எதிர்ப்பு செயல் திட்டம் 2025-2029’ ஐ இன்று தொடங்கி வைத்து உரையாற்றும் போது ஜனாதிபதி அனுர குமார திசாநாயக்க இந்த அறிக்கையை வெளியிட்டார்.