சவுதி அரேபியாவை நவீன தேசமாககட்டியெழுப்பிய இளம் தலைவர்முஹம்மத் பின் சல்மான்

“எட்டு வருடங்களில் உலகம் சவுதியை திரும்பிப் பார்க்கும் அளவுக்கு அபரிமித வளர்ச்சி”

‘“உக்ரைன் – ரஷ்ய போரை முடிவுக்கு கொண்டு வருவதற்கான வரலாற்று முக்கியத்துவம் மிக்க பேச்சுவார்த்தைகள் நடத்தி உலகின் கவனம் சவுதியின் பக்கம் ஈர்க்கப்பட்டு க்ளீன்”

“இலங்கைக்கு மனிதாபிமான உதவிகள் மாத்திரமல்லாமல் உட்கட்டமைப்பு அபிவிருத்திகளுக்கும் பாரிய ஒத்துழைப்புக்களும் பட்டத்து இளவரசரின் நேரடிக் கண்காணிப்பின் கீழ் முன்னெடுக்கப்படுகின்றன”

“சவுதி அரேபியாவின் பட்டத்து இளவரசராகவும், பிரதமராகவும் முஹம்மத் பின் சல்மான் பின் அப்துல் அஸீஸ் ஆல் ஸஊத் நியமிக்கப்பட்டு இன்றுடன் (26.03.2025)எட்டு வருடங்கள் நிறைவடைகிறது . அதன் நிமிர்த்தம் இக்கட்டுரை பிரசுரமாகிறது.”

இரு புனிதப் பள்ளிவாசல்களின் பாதுகாவலரும் சவுதி அரேபிய மன்னருமான சல்மான் பின் அப்துல் அஸீஸ் ஆல் ஸஊத் புனித மக்காவில் வைத்து சவுதியின் இளவரசர் பட்டத்தை முஹம்மத் பின் சல்மான் பின் அப்துல் அஸீஸ் ஆல் ஸஊத்துக்கு ஹிஜ்ரி 1438 புனித ரமழான் மாதம் பிறை 26ல் அதாவது 2017.06.21 ஆம் திகதி வழங்கி கௌரவித்தார். இந்நியமனம் வழங்கப்பட முன்னர் பிரதிப் பிரதமராகவும் பாதுகாப்பு அமைச்சராகவும் கடமையாற்றினார் முஹம்மத் பின் சல்மான். இந்நிலையில் மன்னர் சல்மான், இளவரசர் முஹம்மத் பின் சல்மானைப் பிரதமர் பதவிக்கும் நியமித்தார்.

தனக்குப் பக்க பலமாக இருந்து நாட்டுக்காக உழைத்துவரும் மகனின் உழைப்பையும் தியாகத்தையும் அர்ப்பணிப்புகளையும் தூரநோக்குச் சிந்தனைகளையும் நிர்வாகத் திறமைகளையும் அவதானித்த தந்தை மன்னர் சல்மான், நாட்டை திறம்பட கட்டியெழுப்ப இவரால் முடியும் என்பதையும் நன்குணர்ந்து கொண்டார். அதற்கேற்ப அவருக்கு இளவரசர் பதவியை வழங்கினார். அவர் நாட்டை முன்னேற்றப்பாதையில் இட்டுச் செல்லக்கூடியவர் என்பதை நாட்டு மக்களும் ஏற்கனவே அறிந்திருந்தனர். அதனால் இளவரசர் பதவிக்கு அவர் நியமிக்கப்பட வேண்டும் என்பதை நாட்டு மக்கள் மிகுந்த ஆவலோடு எதிர்பார்த்திருந்தனர். இந்நிலையில் மக்கள் அனைவரும் அவரது நியமனத்தை பெரிதும் வரவேற்று பாராட்டியதோடு அவரை ‘இளைஞர்களின் தலைவர்’ எனவும் அழைக்கலாயினர்.
முஹம்மத் பின் சல்மான் இளவரசராக நியமிக்கப்பட்டமை சவுதியின் பிரமாண்டமான மறுமலர்ச்சியை அடைந்து கொண்டுள்ளது. சுருசுருப்பு மிக்க இளம் வயதுடையவரான இவர், பரந்த அரசியல் பின்னணி கொண்ட குடும்பத்தில் பிறந்து வளர்ந்ததோடு அரசியல் முதிர்ச்சி மிக்கவராகவும் திகழுகிறார்.

நவீன உலகுக்கு ஏற்ற வகையில் சவுதியைக் கட்டியெழுப்புவதில் அதிக கவனம் எடுத்துக் கொண்டுள்ள முஹம்மத் பின் சல்மான், விஷன் 2030 என்ற வரலாற்று முக்கியத்துவம் மிக்க தொலைநோக்கு திட்டத்தை நாட்டுக்கு அறிமுகப்படுத்தினார். இத்திட்டத்தின் படி சவுதியைக் கட்டியெழுப்பும் அனைத்து வேலைத்திட்டங்களும் முன்னெடுக்கப்பட்டு வருகின்றன. இப்பயணத்தில் அவர் பல சாதனைகளையும் நிலைநாட்டியுள்ளார். குறிப்பாக கடந்த 08 ஆண்டுகளில் அவர் புரிந்துள்ள சாதனைகள் சவுதி வரலாற்றில் அழியாத்தடம் பதித்துள்ளன. குறிப்பாக சவுதி உலகில் மிகச் சிறந்த ஒரு நாடாக விளங்குகிறது.

உலக முஸ்லிம்கள் மார்க்க ரீதியில் அவர்களது புனிதக் கடமையான ஹஜ், உம்ரா கிரியைகளை நிறைவேற்றவும் மேற்கொள்ளவும் சவுதி அரேபியாவுக்கு செல்ல வேண்டும். புனிதக் கடமைகளை நிறைவேற்ற வரும் உலக முஸ்லிம்களுக்கு தேவையான அனைத்து வசதிகளையும் சவுதி ஏற்படுத்திக் கொடுக்கின்றது. குறிப்பாக புனித மக்கா, மதீனா வரும் யாத்திரிகர்களுக்கு இரு ஹரம் ஷரீப்களிலும், விமான நிலையங்களிலும், தரிசிக்கின்ற புனித இடங்களிலும் அளவிலா சேவைகளைச் செய்து வருகின்றனர். சவுதி முன்னெடுத்துவரும் இந்த இணையற்ற சேவைகளை உலக மக்கள் பெரிதும் பாராட்டிய வண்ணமுள்ளனர். அந்தளவுக்கு முஹம்மத பின் சல்மான் தன் தந்தை மன்னர் சல்மானுடன் இணைந்து இச்சேவைகளை முன்னெடுத்து வருகிறார். அத்தோடு இஸ்லாமியச் சின்னங்களையும் புராதனச் சின்னங்கள் பலவற்றையும் சவுதி தன்னகத்தே கொண்டிருப்பதும் குறிப்பிடத்தக்கதாகும்.

மேலும் மத்திய கிழக்கின் தலைநகராக விளங்கும் சவுதி, பொருளாதார ரீதியில் மிகவும் சக்திவாய்ந்த நாடாகவும் திகழ்கிறது. இயற்கை வளங்கள் நிறைந்த நாடான போதிலும் அந்த வளங்களில் மாத்திரம் தங்கியிராமல் அதையும் தாண்டி பொருளாதாரத்தை முன்னேற்றப் பாதையில் சவுதி பயணிக்க வித்திட்டுள்ளார் இளவரசர். இதன் நிமித்தம் பாரிய வேலைத்திட்டங்களை அவர் முன்னெடுத்துள்ளார்.
இதன் பயனாக உல்லாச பயணத்துறை சவுதியின் பொருளாதாரம் மேலும் வளர்ச்சியடைய வழிவகுத்துள்ளது. குறிப்பாக 2023 இல் 150 மில்லியனுக்கும் மேற்பட்ட சுற்றுலாப்பயணிகள் சவுதிக்கு விஜயம் செய்துள்ளனர். ஆன போதிலும் சுற்றுலாப் பயணிகளை மேலும் ஈர்க்கும் வகையில் திர்இய்யா, முகஅப், கித்திய்யா, சவுதி பசுமைத்திட்டம், மத்திய கிழக்கு பசுமை, அல் உலா சுற்றுலா என பல்வேறு பாரிய அபிவிருத்தித்திட்டங்களும் அவரது சிந்தனையின் அடிப்படையில் முன்னெடுக்கப்படுகின்றன. இத்திட்டங்கள் அனைத்தும் வெற்றியும் கண்டுள்ளன.

தற்போது தொழில்நுட்பம், நிர்வாக கட்டமைப்பு போன்றவற்றிலும் சவுதி முன்னிலையில் உள்ளது. தொழில்நுட்பம் மற்றும் நிர்வாகக் கட்டமைப்பில் சவுதி அடைந்துள்ள முன்னேற்றத்தை பிரித்தானியா அடைய இன்னும் 30 ஆண்டுகள் செல்லுமெனத் தெரிவிக்கப்படுகிறது. இம்முன்னேற்றத்திற்கும் இளவரசரின் பங்களிப்பு அளப்பரியதாகும்.

அதேநேரம் ஜி 20, பிரிக்ஸ் அமைப்புக்களில் அங்கம் வகிக்கும் வலுவான பொருளாதார நாடுகளுடன் போட்டி போட்டு தனது நாட்டு பொருளாதாரத்தை வலுப்படுத்த இளவரசர் கடுமையாக உழைத்து வருகிறார். ஆயுத உற்பத்தியிலும் உலக வல்லரசுகளை முந்தும் அளவுக்கு பாரிய முன்னேற்றங்களை அடைந்துள்ளது சவுதி. உலகில் போரிடத் தயார் நிலையில் இருக்கும் படைகளில் முதன்மையான படையாக விளங்கும் சவுதி அரேபியா படை வீரர்கள் உலகின் ஆறாவது சக்திவாய்ந்த இராணுவமாகவும் கருதப்படுகிறது.

கடந்த எட்டு ஆண்டுகளில் உலக வல்லரசுகள் அனைத்தும் மூக்கின் மேல் கை வைத்து சிலாகிக்கும் அளவுக்கு சவுதியை மாற்றியுள்ளார் இளவரசர். இன்று உலகின் மூத்த தலைவர்கள், அரசியல்வாதிகள், நிதியாளர்கள் மற்றும் பொருளாதார வல்லுனர்களுக்கு ஒரு முக்கிய இடமாக சவுதி திகழுகிறது. பல்தேசிய நிறுவனங்கள் தங்கள் தலைமையகங்களை சவுதியின் தலைநகர் ரியாதில் அமைத்துள்ளன. இவ்வாறு பல்வேறு திட்டங்கள் மற்றும் உத்திகளுடன் இளவரசர் சவுதி அரேபியாவின் விண்ணை ஒளிரச் செய்துள்ளார்.

இவை இவ்வாறிருக்க, தொழில்நுட்பக்கல்வி மற்றும் தொழில் பயிற்சித்துறையில் சவுதி உலகளவில் முதலிடம் பிடிக்கவும் அவர் வழிசெய்துள்ளார். வளர்ச்சியடைந்த நாடுகளால் மாத்திரம் தான் விண்வெளிக்கு பயணிக்கலாம் என்றிருந்த நிலையை மாற்றி நாமும் சளைத்தவர்கள் அல்லர் என்ற அடிப்படையில், சவுதி வீர வீராங்கனைகளை விண்வெளிக்கு அனுப்பி அவர் சாதனை புரிந்துள்ளார். அத்தோடு தனது நாட்டு மாணவ மாணவிகளையும் பல்துறைகளிலும் சாதனைகள் புரிய வைத்திருக்கிறார் அவர். அதன் ஊடாக சவுதி ஆராய்ச்சித்துறையில் உலகில் முன்னணி நாடாக விளங்குகிறது. சர்வதேச மட்டத்தில் இடம்பெற்ற கண்டுபிடிப்பு போட்டிகள் பலவற்றில் முதலாம், இரண்டாம் இடங்களை தன்வசப்படுத்தி கொண்ட சவுதி, 100 பேர் கலந்து கொண்ட சர்வதேச கண்டுபிடிப்பு போட்டியொன்றில் முதல் 37 இடங்களை தன்வசப்படுத்தி சாதனை படைத்துள்ளது. இதற்கான பெருமை இளவரசர் முஹம்மத் பின் சல்மானையே சாரும்.

இவை இவ்வாறிருக்க, உலக மக்களின் பிரச்சினைகளைத் தீர்த்து வைப்பதிலும் சவுதி முன்நிற்கிறது. குறிப்பாக உக்ரைன்-ரஷ்யா மோதல், சூடான், பலஸ்தீன் பிரச்சினைகளுக்கும் சமாதான வழிகளில் தீர்வுகளைப் பெற்றுக்கொடுக்கவும் இளவரசர் தீவிரமாக உழைத்து வருகிறார். இதற்கேற்ப ரஷ்ய – உக்ரைன் போர் நிறுத்தத்திற்கான அமெரிக்கா பேச்சுவார்த்தைகளை சவுதியில் நடத்த வழிவகை செய்தார். அந்த வகையில் அமெரிக்க – ரஷ்ய பிரதிநிதிகளுக்கும், அமெரிக்க – உக்ரைன் பிரதிநிதிகளுக்கும் என வரலாற்று முக்கியத்துவம் மிக்க இரு பேச்சுவார்த்தைகள் இடம்பெற்றுள்ளன. இப்பேச்சுவார்த்தைகள் உலகை சவுதியின் பக்கம் ஈர்த்துள்ளன.

மேலும் சூடானில் ஏற்பட்ட உள்நாட்டுப் பிரச்சினையை மிகக் கவனமாகக் கையாண்டு சம்பந்தப்பட்ட இரு தரப்பினரையும் சவுதி அரேபியாவுக்கு அழைத்து சமாதானத்தை ஏற்படுத்த முயற்சிகளை முன்னெடுத்த இளவரசர், சூடான் உள்நாட்டு யுத்தத்தில் சிக்குண்டிருந்த பல நாடுகளையும் சேர்ந்த மூவாயிரத்துக்கும் மேற்பட்டோரை பாதுகாப்பாக சவுதிக்கு அழைத்து வந்து அவர்களுக்கு உணவு, மருத்துவம், தங்குமிடம் உள்ளிட்ட அனைத்து வசதிகளையும் செய்து கொடுத்து அவரவர் நாட்டுக்கு பாதுகாப்பாக அனுப்பி வைத்த பெருமையும் இவரையே சாரும்.

அந்த வகையில் சூடானில் சிக்குண்டிருந்த இலங்கையைச் சேர்ந்த நூற்றுக்கும் மேற்பட்டோரும் பாதுகாப்பாக மீட்கப்பட்டு கொழும்புக்கு அனுப்பி வைக்கப்பட்டனர். அவர்கள் தொடர்பில் சவுதி அரேபிய வெளிவிவகார அமைச்சர் பைஸல் பின் பர்ஹான் ஆல் ஸஊத் அப்போதைய இலங்கை வெளிவிவகார அமைச்சருடன் தொடர்பு கொண்டு விபரங்களை வழங்கவும் தவறவில்லை.
இலங்கை – சவுதி அரேபிய இராஜதந்திர உறவு 50 ஆண்டுகளை நிறைவு செய்துள்ளது. இக்காலப்பகுதியில் இலங்கையின் அனைத்து உட்கட்டமைப்பு வசதிகளின் அபிவிருத்திக்கும் சவுதி உதவி, ஒத்துழைப்புக்களை நல்கியுள்ளது. குறிப்பாக கிழக்கில் பாலங்கள் அமைத்தல், கண் சத்திர சிகிச்சை முகாம்களை நடத்துதல், வருடாவருடம் பல தொன்கள் பேரீச்சம் பழத்தை இலவசமாக வழங்குதல், தேசிய மட்ட அல்குர்ஆன் மனனப் போட்டிகளை நடத்துதல், கொழும்பு தேசிய வைத்தியசாலையில் நரம்பியல் சிகிச்சைகளுக்கான 6 மாடிகள் கொண்ட கட்டடத் தொகுதியை அமைத்துக் கொடுத்தல், பல்கலைக்கழகங்களின் உட்கட்டமைப்பு அபிவிருத்திக்கான உதவிகள், நெடுஞ்சாலைகள் அபிவிருத்தி, இலங்கை மாணவர்கள் உள்நாட்டிலுள்ள பல்கலைக்கழகங்களிலும் சவுதி பல்கழைக்கழகங்களிலும் உயர்கல்வியைத் தொடர புலமைப் பரிசில் வழங்குதல் உள்ளிட்ட பல்வேறு உதவி ஒத்துழைப்புகள் இளவரசரின் நேரடி கண்காணிப்பில் நடந்த வண்ணமுள்ளது.

இவை இவ்வாறிருக்க, போரினால் பாதிக்கப்பட்டுள்ள பலஸ்தீன், சூடான், சிரியா நாடுகளுக்கு மாத்திரமல்லாமல் உக்ரைன் மக்களுக்கும் பல தொன் மனிதாபிமான உணவுப் பொருட்களை அனுப்பி தமது மனிதாபிமானத்தையும் வெளிப்படுத்தியுள்ளார் இளவரசர். அவரது இத்தகைய முயற்சிகளும் வேலைத்திட்டங்களும் உலகின் சமாதானத் தூதுவர் எனப் பலராலும் பாராட்டப்படும் அளவுக்கு அவரை உயர்த்தியுள்ளது.

அதேநேரம், மனிதாபிமானத்தில் சவுதியை விஞ்சிய ஒரு நாடு இல்லை. அந்தளவுக்கு உலகை வென்றுள்ளது சவுதி. பலஸ்தீனப் பிரச்சினையை இராஜதந்திர ரீதியில் கையாளுவதில் இளவரசர் முஹம்மத் அரும்பாடுபட்டு வருகிறார். இதன் நிமித்தம் சவுதி ஏற்பாட்டில் பல உச்சிமாநாடுகள் நடாத்தப்பட்டுள்ளன. இளவரசர் முஹம்மத்தும் வெளிவிவகார அமைச்சர் பைஸல் பின் பர்ஹான் ஆல் ஸஊத்தும் பலஸ்தீன விவகாரம் தொடர்பில் தொடர்ந்தும் இராஜதந்திர முயற்சிகளை முன்னெடுத்து வருகின்றனர். அத்தோடு மன்னர் சல்மான் மற்றும் இளவரசர் முஹம்மத் ஆகியோரின் விஷேட வேண்டுகோளுக்கு அமைய அவ்விருவரும் அடங்கலாக சவுதி அரேபிய மக்கள் அனைவரும் பிரமாண்டமானதொரு நன்கொடை சேகரிப்பில் ஈடுபட்டு பாதிக்கப்பட்ட பலஸ்தீன மக்களுக்கு நிவாரணம் வழங்கியும் உள்ளனர்.

ஒரு நாடு முன்னேற வேண்டும் என்றால் அந்நாட்டில் ஊழல் ஒழிக்கப்பட வேண்டும். அதை நன்குணர்ந்த இளவரசர், தாம் பொறுப்பை ஏற்ற பின் ஊழல் ஒழிப்பு நடவடிக்கைகளை முன்னெடுத்தார். அரச குடும்பத்தைச் சேர்ந்தவராக இருந்தாலும் அவர்கள் மேற்கொண்ட ஊழல்கள் மூலம் அடைந்து கொண்ட நிதிகளை அவர்களிடமிருந்து பலவந்தமாகப் பெற்று நாட்டின் திறைசேரியில் சேர்த்தார் இளவரசர். இதன் ஊடாக நாடு இழந்த பல பில்லியன் ரியாழ்கள் மீண்டும் நாட்டுக்குக் கிடைத்தது. இது நாட்டு மக்களின் பெரும் ஆதரவையும் ஒத்துழைப்பையும் அவருக்குப் பெற்றுக் கொடுத்தது. ஊழலுக்கு எதிரான பிரசாரத்தை தலைமை தாங்கி முன்னெடுக்கும் இளவரசர், திருடப்பட்ட அல்லது மோசடி செய்யப்பட்ட தேசத்தின் பணம் அனைத்தையும் மீட்டுக் கொடுத்த பெருமையைப் பெற்றவராகவும் விளங்குகிறார்.

அதேவேளை தாம் பதவிக்கு வந்த பின்னர் தமது நாட்டில் பயங்கரவாதம், போதைப்பொருள் குற்றங்கள் அனைத்தையும் இளவரசர் அடியோடு இல்லாதொழித்துள்ளார். பிராந்திய மற்றும் உலக அளவில் தீவிரவாதம் மற்றும் பயங்கரவாதத்தை எதிர்த்துப் போராடும் 44 நாடுகளை உள்ளடக்கிய மிகப்பெரிய இஸ்லாமிய இராணுவக் கூட்டணியின் மிக முக்கியமான தலைவராகவும் இவர் விளங்குகிறார். உலகளவிலும் பிராந்திய அளவிலும் சவுதி அரேபியாவின் நிலையை வலுப்படுத்தியுள்ள இளவரசர், உள்ளூர் மற்றும் சர்வதேச மட்டங்களில் பல இராஜதந்திர சாதனைகளையும் படைத்துள்ளார்.

உலகில் யாராவது தங்களது நாட்டில் பயங்கரவாதத்தையும் போதைப்பொருள் குற்றங்களையும் ஊழலையும் ஒழித்து நாட்டுப் பிரஜைகளுக்கு அளப்பரிய சேவைகளைச் செய்து தங்களது நாட்டை முன்னேற்றப்பாதையில் இட்டுச் செல்ல வேண்டும் என்றால் அதற்கான சிறந்த முன்மாதிரிகளாக சவுதி அரேபிய மன்னரும் இளவரசர் முஹம்மத் பின் சல்மானும் விளங்குகின்றனர்.

ஆக, சவுதி அரேபியாவையும் அதன் மக்களையும் நவீன யுகத்திற்கு ஏற்ப கட்டியெழுப்புவதிலும் முன்னேற்றப்பாதையில் இட்டுச் செல்வதிலும் இளவரசர் முஹம்மத் பின் சல்மான், அர்ப்பணிப்புக்களுடன் உழைத்து வருகிறார் என உறுதிப்படக்கூற முடியும். நவீன சவுதியை செதுக்கும் தனித்துவம் மிக்க சிற்பியாக விளங்குகிறார் அவர். அதனால் இரு புனிதப் பள்ளிவாசல்களின் பாதுகாவலரும் மன்னருமான சல்மான் பின் அப்துல் அஸீஸ் ஆல் ஸஊத் மற்றும் இளவரசர் முஹம்மத் பின் சல்மான் பின் அப்துல் அஸீஸ் ஆல் ஸஊத் ஆகியோரையும் சவுதி அரேபிய மக்களையும் சவுதி அரேபிய தேசத்தையும் சர்வ வல்லமை படைத்த அல்லாஹ் என்றும் பாதுகாத்திடட்டும்.

அஷ்ஷைக் எம்.எச். ஷைஹுத்தின் (மதனி)
பணிப்பாளர்,
அல் ஹிக்மா நிறுவனம்.
கொழும்பு