கதுருவெலவில் நிர்மாணிக்கப்படும் மும்மொழி பாடசாலைக்கு பிரதமர் ஹரிணி கண்காணிப்பு விஜயம்

இந்திய அரசாங்கத்தின் நிதியுதவியின் கீழ் கதுருவெல பகுதியில் நிர்மாணிக்கப்பட்டு வரும் மும்மொழி யிலான தேசிய பாடசாலையின் தற்போதைய நிலை  மற்றும் குறித்த பாடசாலையின் எதிர்கால செயற்பாடுகள் தொடர்பாக கண்காணிப்பு விஜயம் ஒன்றை மேற்கொண்ட போது   பிரதமர் ஹரினி அமரசூரிய  தலைமையில் விசேட கலந்துரையாடல் ஒன்று நடைபெற்றது.

வலயத்தில் அனைத்து இன மதங்களையும் பிரநிதித்துப்படுத்தும் வகையில் சகல பிள்ளைகளும் கல்வியை பெறுவதற்கான வசதியை நோக்கமாகக் கொண்டு கட்டியெழுப்பபட்டு வரும் இந்த பாடசாலையின் நிர்மாணப்பணிகள் பல வருடங்களாக மந்தகதியில் இடம்பெற்றமை தொடர்பில் இதன்போது பிரதமரின் கவனத்துக்கு கொண்டு வரப்பட்டது.

இந்திய அரசாங்கத்தின் நிதியுதவியின் கீழ் நிர்மாணிக்கப்பட்டு வரும் முன் பக்க கட்டிடத்தின் பணிகள் 75% நிறைவடைந்துள்ளதுடன் அதன் மீதமுள்ள பணிகளை நிறைவு செய்வதற்கு 150 மில்லியன் ரூபா செலவாகும் எனவும். இரண்டாம் கட்டிடம் இலங்கை அரசின் நிதியின் கீழ் நிர்மாணிக்கப்படுவதுடன் அதன் பணிகள் 40 ‘/. நிறைவடைந்துள்ளதாவும் மீதமுள்ள பணிகளை நிறைவு செய்வதற்கு 400 மில்லியன் ரூபா தேவைப்படுவதாகவும் கட்டிட நிறுவனத்தினால் சுட்டிக்காட்டபட்டது.

பாடசாலை ஆரம்பிக்கப்பட்டதன் பின்னர் ஒரே நேரத்தில் 1600 மாணவர்கள் கற்றல் செயற்பாடுகளில் ஈடுபடக்கூடிய வசதிகள் இங்கு காணப்படுவதுடன்.விசேட கல்விப் பிரிவு, மொழி வகுப்பறை , e -leaming வகுப்பறை ,விடுதி நிர்வாக கட்டிடம், ஆய்வுகூட வசதிகள் , அடிப்படை வசதிகள் உட்பட ஆசிரியர் உத்தியோகபூர்வ இல்லம் உள்ளிட்ட வசதிகளைக் கொண்டதாக பாடசாலையை நிர்மாணிப்பதற்கு திட்டமிடப்பட்டுள்ளதாக கட்டிட நிறுவன பொறியாளர் பிரதமரின் கவனத்துக்கு கொண்டு வந்தனர்.

இந்த வளங்களை அழிவடைவதற்கு இடமளிக்காது பிள்ளைகளின் கல்விக்கென அவற்றை கட்டியெழுப்புவதற்கு தேவையான பிரேரணைகள் மற்றும் திட்டங்களை உடனடியாக முன்வைக்குமாறு பிரதமர் அதிகாரிகளுக்கு ஆலோசனை வழங்கியுள்ளார்.

குறித்த விஜயத்தின் போது வடமத்திய மாகாண ஆளுநர் வசந்த ஜினதாச வீடமைப்பு பிரதி அமைச்சர் டீ.பீ.சரத் பொலன்னறுவை மாவட்ட பாராளுமன்ற உறுப்பினர்களான பத்மசிறி பண்டார, சுனில் ரத்நாயக்க கல்வி உயர் கல்வி மற்றும் தொழில் கல்வி அமைச்சின் செயலாளர் நாலக கழுவெள பொலன்னறுவை மாவட்ட செயலாளர் சுஜந்த ஏக்கநாயக்க உட்பட அதிகாரிகள் பலரும் கலந்து கொண்டனர்.

(எம்.ரீ.ஆரிப் அநுராதபுரம்)