பாடசாலை மாணவி கடத்தல்; சந்தேக நபர்களுக்கு 27 வரை விளக்கமறியல்

கம்பளை, தவுலகல பகுதியில் வானில் பாடசாலை மாணவி ஒருவரை கடத்திச் சென்ற சம்பவத்துடன் தொடர்புடைய பிரதான சந்தேக நபரையும், கடத்தலுக்கு ஆதரவளித்த மற்றொரு சந்தேக நபரையும் இம்மாதம் 27 ஆம் திகதி வரை விளக்கமறியலில் வைக்க உத்தரவிடப்பட்டுள்ளது.

சந்தேக நபர்கள் நேற்று (15) கம்பளை நீதவான் நீதிமன்றத்தில் ஆஜர்படுத்தப்பட்டதை அடுத்து இந்த உத்தரவு பிறப்பிக்கப்பட்டது. கடந்த 11 ஆம் திகதி வானில் வந்த ஒரு குழுவினரால் சிறுமி கடத்தப்பட்டார்.

அதன்படி, தவுலகல பொலிஸ் நிலையமும் சிறப்பு பொலிஸ் அதிகாரிகளின் பல குழுக்களும் சம்பந்தப்பட்டவர்களைக் கைது செய்ய விசாரணைகளைத் தொடங்கின.

இதன் விளைவாக, இந்தக் கடத்தலில் தொடர்புடைய முக்கிய சந்தேக நபர் கடந்த 13ஆம் திகதி அம்பாறை நகரில் வைத்து கைது செய்தனர்
கடத்தப்பட்ட மாணவியும் பாதுகாப்பாக மீட்கப்பட்டார்.

நேற்று முன்தினம் (14) சம்பவத்துடன் தொடர்புடைய மற்றொரு சந்தேக நபரையும் பொலிஸார் கைது செய்தனர்.

கடத்தலுக்காக சந்தேக நபர்கள் வந்த வானும் பொலிஸாரின் காவலில் எடுக்கப்பட்டது, அதன் ஓட்டுநர் பின்னர் பொலிஸாரால் கைது செய்யப்பட்டு, நீதிமன்றத்தில் ஆஜர்படுத்தப்பட்டு, காவலில் வைக்கப்பட்டார்.

கடத்தப்பட்ட சிறுமி தற்போது மருத்துவரால் பரிசோதிக்கப்பட்ட பின்னர் நீதிமன்றத்தில் ஆஜர்படுத்தப்பட்டு, அவரது பெற்றோரின் காவலில் வைக்கப்பட்டுள்ளார்.

இந்த சம்பவம் குறித்து தவுலகல பொலிஸார் மேலதிக விசாரணைகளை மேற்கொண்டு வருகின்றனர்.