முச்சக்கர வண்டி சாரதி ஸ்தலத்தில் பலி

அனுராதபுரம் புத்தளம் பிரதான வீதியில் 7ம் கட்டை பகுதியில் முச்சக்கர வண்டியும் வேணொன்றும் மோதி விபத்திற்குள்ளானதில் முச்சக்கர வண்டியின் சாரதி ஸ்தலத்திலேயே உயிரிழந்துள்ளதாக பொலிசார் தெரிவித்தனர்.

அனுராதபுரத்தில் இருந்து புத்தளம் நோக்கி பயணித்த முச்சக்கர வண்டியின் சாரதி வீதியைக் கடந்த காட்டு யானையைக் கண்டு பீதியடைந்து தனது வாகனத்தை திருப்ப முற்பட்ட போது புத்தளத்தில் இருந்து அனுராதபுரம் நோக்கிப் பயணித்த வேனுடன் முச்சக்கர வண்டி மோதி விபத்திற்குள்ளாகியுள்ளது.

குறித்த விபத்தில் உயிரிழந்தவர் இராஜாங்கனைப் பகுதியைச் சேர்ந்த 50 வயதுடைய நபர் என பொலிசார் தெரிவித்தனர். சம்பவத்துடன் தொடர்புடைய வேனின் சாரதி கைது செய்யப்பட்டுள்ளதுடன் மேலதிக விசாரணைகளை கருவலகஸ்வெவ பொலிசார் மேற்கொண்டுள்ளனர்.

கடந்த காலங்களில் குறித்த வீதியில் இது போன்ற பல விபத்துகள் இடம்பெற்று பல  உயிர்கள் காவுகொள்ளப்பட்டுள்ளதாக பிரதேச மக்கள் தெரிவித்தனர்.

(எம்.ரீ.ஆரிப் அநுராதபுரம் )